Saraiki novel by Nadeem Qasir uchvi...سرائیکی افسانہ۔۔۔ نصیبیں دیاں ڳالھیں از. ندیم قاصؔر اچوی

سرائیکی افسانہ۔۔۔ نصیبیں دیاں ڳالھیں از. ندیم قاصؔر اچوی

نصیبیں دیاں ڳالھیں

از. ندیم قاصؔر اچوی

"ابا اے سولہواں رشتہ ہے جو وی آمدن ݙیکھ تے ویندن تے ول رشتے توں انکار کر ݙیندن۔" جنت پیو کوں آکھیا۔

کالو اپنڑیاں ہنجوں اوگھیدیں ہوئیں"میڈی دھی اللّٰہ سئیں کوں تیݙے کیتے کوئی چنڳاں رشتہ منظور ہوسی ایں سانگوں اے لوک انکار کر ویندن۔ اللّٰہ سئیں میݙی دھی کوں کوئی چنڳاں تے عزت آلا "ور" ڈیسی ۔ " کالو نے جنت دے سر اُتے ہتھ رکھیندیں ہوئیں آکھیا۔

اچھا میݙی دھی میں ٻاہر ویندا پیاں والدڑ تے کیا ساوزی گھدا آواں؟

"جیڑھی چیز تے تہاڈا دل کرے گھدی آواہے"

کالو اپنی دھی دے سامنے اے ظاہر نہ تھیوݨ ݙیندا پیا ہا جو او اندروں کتنا تروٹ ڳیا ہے۔ گھر دے نال چاہ دا ہک ہوٹل تے ساوزی دی دوکان ہئی۔ کالو دے ذہن وچ ایہا ڳال گھمدی کھڑی ہئی جو میڈی دھی دا کیا بنڑسی ہکو ہکو دھی اے بن ماں دے پالیم ایندی ماں وی میں تے پیو وی میں شاید اج ایندی ماں جیندی ہووے ہا۔ میکوں اے ݙیں ناں، ݙیکھنا پووے ہا۔ ساری حیاتی غربت وچ گزری اے تے میں ایندی خاطر کجھ وی نی کر سڳیا۔

"کاکا کالو وئے کاکا کالو" چاہ دے ہوٹل تے ٻیٹھے رمضان (کالو دا ہمسایہ) کالو کوں سݙیا مگر کالو اپنی سوچ اچ گم اڳوں تے ٹر ڳیا۔ رمضان کوں کالو نال ہمدردی ہئی۔ اٹھی تے پچھوں ٹر پیا تے پچھوں مونڈھے تے ہتھ رکھ تے آکھیا۔

"خیر ہے کاکا؟ میں تیکوں سڈینڈاں ٻیٹھاں توں سݨا نیوی"؟

"بس کاکا رمضان پریشانی ہے تے ہوں سوچ اچ ویندا پیا ہم"؟

کالو میاں! میکوں ݙسا تاں سہی کیا پریشانی اے تیکوں"

"بس کاکا رمضان بیاں پریشانیاں اپنی جاہ تے مگر دھی دی پریشانی میکوں کھادی ویندی اے اڄ وی چُھوہَر والیاں دی طرفوں انکار تھی ڳے کاکا اے سولہواں رشتہ اے جیڑھا انکار کر ڳے۔تیکوں تاں پتہ اے میں دمے دا مریض ہاں۔ بیماری میݙی جوانی کھا گئی اے۔ اللّٰہ سئیں توں ایہا دعا منگداں جو اپنی دھی کوں گھر دا کر ݙیواں ول بے شک موت آ ونڄے اگر میکوں کجھ تھی گیا تاں میݙی دھی رُل ویسی."

"اللّٰہ سوہنڑا چنڳاں کریسی کالو میاں! میݙی دعا اے دھی جنت کیتے"

"بس رمضان میاں! کیا حال پچھدیں سردار رب نواز محروم شودا ٻہوں چنڳاں بندہ ہا میکوں اپنی زمین وچ کوٹھا وی بنڑوا ݙتوس تے رہن وی ݙتوس۔ مگر اوندے بعد اوندے پتر سردار خلیل چار پنج دفعہ پیغام ݙتے جو زمین خالی کرو یا زمین دے پیسے ݙیوو۔ "

"بس کاکا ہک اے بیماری کھا گئی اے میکوں اتوں اے دھی دی پریشانی ول ہن انہاں زمینداراں دیاں دھمکیاں میکوں مکائی ویندن۔"

"بس کاکا میں وی تیئں وانگوں غریب اں ہن اساں انہاں وݙے لوکاں دا مقابلہ کیویں کر سڳدوں۔" رمضان ، کالو دے مونڈھے تے ہتھ رکھیندے ہوئیں آکھیا۔

"اچھا ڄل کاکا کالو تیکوں چاہ پلاواں"۔

"کاکا دل بہوں اداس اے میں جنت دی ماء دی قبر توں تھیاں آواں ول امدا پیاں۔ رمضان پچھوں تے ہوٹل ݙو ٹر پیا تے کالو قبرغستان ݙو۔ جنت دی ماء دی قبر دے سراہندی ٻہہ تے ڈھیر ساری دیر رونا "جنت دی ماں اج اخری دفعہ آیا ٻیٹھاں ول تئیں ݙو جیندیاں کینا اساں تئیں ݙو ہن جݙاں تیئں ݙو آیوم تاں ول میں کینا ویساں۔" ہنجوں اوگھیدیں ہوئیں کالو ٻولیا۔

تے واپس گھر ݙو ٹر پیا۔ ساوزی دی دوکان توں ادھا کلو آلو گھن تے گھر پڄا۔ پورے گھر دا کُل اثاثہ ݙو کھٹوں ترائے بسترے پنج ست گلاس تے باقی چار پنجھ ضروری تھاں ہن۔ رات کوں رمضان گھر آیا تے کالو کوں آکھیا جو ہک بندہ ہے تے اپنے پتر دا رشتہ کرݨا چاہندے ۔کاکا کالو توں اکھیں تاں ڳال چولاں رشتے دی ۔ کالو نے کتھوں انکار کرنا ہا.

انوں ہاں کر ڈتی نال اے وی آکھیا جو رشتے والیاں کوں آکھو جو میݙے کینے ݙاج کینی ایہو ݙاج تاں میڈی دھی دی عمر کھا ڳے اج اے28 سالاں دی تھئی ڳئی اے۔ میں ݙاج ݙے سڳدا تاں کݙاں دی شادی تھی ڳئی ہوندی۔ میکوں تاں قرض وی کوئی نی ݙیندا ۔ اگر کوئی ݙیندا تاں قرض چا تے دھی کوں ݙاج ݙیندا۔ پر رشتے آلے لکھاں وچ ݙاج مگدن تے میں لاچار پیو کتھوں ݙاج آنا۔ کاکا رمضان سولہاں رشتے ایں سانگوں تاں انکار کر ڳن جو میں لاچار پیو انہاں دے مطابق ݙاج ناں ڈے سگدا ہم۔ "اچھا کاکا کالو میں کل انہاں کوں گھن آمداں۔" کل دا وعدہ کر تے رمضان ٹر ڳیا۔ کالو ساری رات ایہو سوچیندا ریہا جو کل وی اگر انکار تھی ڳیا تاں کیا بنڑسی۔ نال رب توں دعا وی کریندا ریہا جو اے لوک ڈاج ناں منگن ۔ ایوویں سوچیندیں سوچیندیں سویر تھی ڳئی ۔ سویلے دے کوئی ساڈھے نو وڄدے پے ہن ۔ رمضان چُھوہَر اتے آؤندے ماں پیو کوں گھن تے آ ڳیا ۔ حیثیت دے مطابق کالو چاہ پاݨی دا بندوبست کیتا۔

"کالو تہاݙا ناں اے"چھوہر دے پیو پچھیا

"جیا سئیں کالو میݙا ناں اے"

"تہاݙے بارے رمضان میکوں ݙسیے جو پہلے ݙھیر سارے رشتے والے انکار چکن ݙاج دی وجہ توں پر میکوں ݙاج دی لوڑ کینی۔"چُھوہَر دے پیو آکھیا

کالو اندرو اندر اللّٰہ سئیں دا شکر کیتا کوئی تاں ہے جیکوں ݙاج دی لوڑ کینی ۔۔۔۔

"اچھا کالو بھرا جنت دھی کوں تاں سݙو"

"جنت پتر ایݙے تاں آؤ" کالو نے آواز ݙتی۔

جنت کمرے توں ٻاہروں آئی ۔ ویسے تاں رنگ روپ چٹا گورا ہا۔ مگر غربت تے پریشانیاں نے جنت دے سر دے ادھے وال چٹے کر ݙیتے ہن۔ جیڑھے جنت نے میندھی لا تے رتے کالے کیتے ہوئے ہن۔ عمر تاں 28 سال ہئی مگر ڈیکھن اچ30سال کنوں وہ زیادہ دی لڳدی ہئی۔ جنت آ تے پیو دے نال کھٹرے تے ٻہہ ڳئی۔ چُھوہَر دی عمر 22 سال ہئی تے شہر ہک سیٹھ دے دفتر وچ صفائی ستھرائی تے آوندا کم کار کرینا ہا ۔ چُھوہَر دی ماں ٻہوں تیز ہئی جلدی جلدی اٹھی تے اپنڑے پئے کوں آکھیا۔"اٹھو میکوں یاد آئے جو میں گھر کوں تالا کینی لایا ہا۔ جلدی ڄلو متاں گھر وچ کوئی چوری چکاری تھی ونڄے۔ رشتہ تاں ڈکھیج گے، ہاں ناں بھرا رمضان دے ہتھوں ݙیوا بھجیسوں۔ بھیرا رمضان ساکوں ٻاہر تک چھوڑی آؤ "

پتر تے پئے کوں نال لاتے ٹر گئی۔

باہر ونج تے آکھیا۔ " بھرا رمضان اساں اتھاں رشتہ نئیں کریندے توں اساکوں ساری گال نی ڈسائی اے نیں ݙسایا جو چھوہر دی عمر ڈھیر اے۔ تساں خود ڈساو جوڑ بنڑدے؟ اساڈے طرفوں جواب ہئی۔"

جواب ڈے تے چلے ڳئے رمضان واپس کالو کول آیا تے انہاں دا جواب سݨایا۔ کالو ٹھڈا ساہ کڈھا تے کھٹ تے سر پکڑ تے بہہ ڳیا۔ رمضان اپݨے گھر ݙو ٹر ڳیا۔ تھوڑی دیر بعد کالو دی طبیعت خراب تھیندی ڳئی تے او کھٹرے تے سمدا ڳیا۔ شودی جنت اتوں پیو کوں الویندی رہی۔ جیڑھلے پیو ناں ٻولیا تے رمضان دے گھر ڳئی۔" چاچا رمضان!چاچا رمضان پتہ نی میݙے ابے کوں کیا تھی ڳئے آلا بول ختم تھی گئے۔" رمضان بڄ تے آیا تے کالو کوں آلوایا۔ مگر کالو اللّٰہ کوں پیارا تھی چکیا ہا۔ شودی جنت تے قیامت دا ڈیں آ پیا ۔ جیڑھا پیو سہارا ہا۔

تے آوندی کل کائنات ہا۔ اڄ اوکوں کلہا کر تے ٹر گیا ۔ رمضان تے وستی دے کجھ لوکاں نے رل تے کفن دفن دا انتظام کیتا۔ پیو دے ٹر ونڄݨ دے بعد شودی جنت کلہی تھی گئی۔ وستی والیاں نے جنت کوں کھاوݨ پیوݨ دا سامان ڈیوݨ تے اللّٰہ ترسی کرݨ شروع کر ݙیتونے۔ شودی جنت پیو دے غم اچ سویر شام روندی رہ ویندی۔ کئی ݙیں گزرن دے بعد سردار

خلیل کوں پتہ لڳیا جو کالو فوت تھی ڳے۔

"وئے ریاضا! (سردار خلیل دا منشی )توں میکوں ݙسایا نیں وئے کالو مر گے۔" سردار خلیل منشی کوں آکھیا

"سردار سئیں تساں اتھاں کینا ہاوے انوں ݙیں تساں شہر ہاوے"

"اچھا کل آپاں وستی ڄلسوں یاد ݙیواویں"۔

"جیا سردار سئیں"

اگلے ݙیں منشی نے سردار خلیل کوں آکھیا جو گاݙی تیار کھڑی اے۔ اج وستی جلناں ہا کالو دا ارمان کرن

ارمان!۔۔۔۔۔۔۔۔۔۔۔۔۔۔۔۔۔۔۔۔۔۔۔۔ارمان! تاں ٹھیک اے اپݨی زمین دا وی اکھنا ہئی جو خالی کَرن سڑک دے نال ہے اونکوں ویچیندوں چنگی بھلی رقم دی ویکسے۔"

"سردار صاب! آوندی دھی کلہی ہے او کتھاں ویسی. "۔ منشی آکھیا

"بس توں کار تیار کر جلوں"

"سردار صاب کار تیار اے جلوں"

کجھ دیر بعد سردار خلیل تے منشی وستی پج گے"‍‍‌ ۔رمضان کوں پتہ لڳا جو سردار خلیل امدا پے ۔ او وی کالو دے گھر پڄ گیا تے باقی وستی دے لوک وی کٹھے تھی ڳے۔ سردار صاب نے دعائے مغفرت کروائی۔

"تہاکوں تاں پتہ اے جو میں کالو کوں پہلے وی آکھیا ہئی جو اے زمین خالی کرے میں اے زمین وچینداں، ہن او گزر چکے آوندی دھی کوں میں ہک کوٹھے دی جاہ بئے پاسے ݙینداں رمضان میاں توں کالو دی دھی کوں آکھیں چا" سردار خلیل نے وستی دے لوکاں دے سامنے آکھیا۔

سردار خلیل واپس ٹر گیا ۔شام کوں رمضان جنت دے گھر آیا تے سردار خلیل دی ساری ڳال سݨا ڈتی شودی جنت روݨ پئے ڳئی تے آکھیا چاچا رمضان توں سویرے میݙے نال جُلیں سردار کوں میں خود اکھساں فریاد کریساں میں کلہی آں میں کتھاں ویساں میݙا کون اے۔"

"اچھا میݙی دھی سویرے میں تیݙے نال ڄلساں۔" رمضان آکھیا

اگلے ݙیں رمضان جنت کوں گھن تے سردار دی حویلی پڄ ڳیا۔ منشی آکھیا جو سردار صاب حالی آرام کریندے پن تساں حالی بہو ۔

ݙوہائیں انتطار اچ بہہ گے۔ سردار سئیں نشے وچ غرق ستا ریہا۔ ݙھیر ساری دیر بعد منشی سردار صاب ݙو ڳیا تے آکھیا " سردار صاب! کالو دی دھی تے رمضان آیا بیٹھے۔ کالو دی دھی تہاکوں ملنا چاہندی اے۔"

"ونج بھیج ڈے آوندی دھی کوں"

"رمضان چُھوہِر کوں بھیج ڈے سردار سئیں سڈیندے پن" منشی نے آواز ڈے تے آکھیا

۔ جنت کلہی ونڄݨ توں ݙر گئی۔ مگر رمضان آکھیا ڄل میݙی دھی میں تیݙے نال اں۔ رمضان وی نال تھی پیا۔ سردار دے کمرے توں باہر منشی نے رمضان کوں جھل گھدا تے جنت کوں آکھیا توں اندر ونڄ۔ جنت ݙردی ݙردی اندر ڳئی۔

"سردار صاب! میں کالو دی دھی اں۔ میݙا کوئی کینی میکوں در بدر ناں کرو۔ ساݙی جاہ ناں توڑواو۔ میں کݙے ویساں میݙا کون اے"۔جنت نے ہتھ ٻدھ تے فریاد کیتی۔

سردار نشے وچ غرق ہا۔ جنت کوں ݙیکھ تے آوندی نیت خراب تھی ڳئی۔ منشی کوں شاید شک تھی ڳیا ہا جو سردار صاب نے جنت کوں کلہا کیوں سݙے۔

" رمضان میاں آ، آپاں ایڈو بہندوں۔" منشی آکھیا

"مگر جنت دھی اندر اے"

"وئے رمضان میاں کیوں فکر کریندیں آ ویندی او وی "

منشی رمضان کوں ہک پاسے گھن تے ونڄ ٻیٹھا۔

"تیݙا ناں جنت اے" سردار خلیل پچھیا

"جیا سئیں سردار صاب"

"اڳوں تے آ اتھاں میݙے سامݨے کرسی تے ٻہہ تے ڳال کر"

"سردار صاب میں اتھائیں تلے ٹھیک اں" ۔ جنت نے نماڑیں تھی تے آکھیا۔

سردار اٹھیا تے دروازہ بند کر تے آکھیا " تیکوں جو آکھیم اتھاں میݙے سامنے آ ٻہہ" سردار غصے اچ آکھیا جنت گھبرا ڳئی۔

سردار خلیل اڳوں تے تھیا تے جنت دا ہتھ پکڑیا نشے وچ غرق ہا

"تیڈا گھر نی بھنیدا تو میݙی ڳال من گھن میں تیݙی منیدا"۔

جنت کوں پتہ لڳ ڳیا جو سردار صاب دی نیت خراب تھی ڳئی اے۔جنت نے ہتھ چھڑواوݨ دی ٻہوں کوشد کیتی مگر ناں چھڑوا سڳی۔ سردار خلیل نے جنت کوں صوفے اُتے دِھکا ݙیتا جنت صوفے اُتے ونڄ پئی۔ تے سردار دے اگوں ہتھ جڑیندی ریہی رحم رحم دی فریاد کریندی رہی۔ مگر سردار خلیل ناں منیا۔ صوفے اتے سردار دا پستول پیا ہا ۔ جیڑھا جنت دے ہتھ لڳ ڳیا تے جلدی نال جنت نے سردار خلیل ݙو تاݨ تے آکھیا"میکوں ونڄݨ ڈیو ناں تاں میں مار ݙیساں۔" جنت دے ہتھ تھرکڈے کھڑے ہن۔ سردار خلیل اڳوں تے تھیا تے اوندا ہتھ وی پستول وچ پئے ڳیا۔ ایں کشمکش وچ سردار دے ہتھوں گولی چل ڳئی تے جنت کوں ڈھڈھ وچ ونڄ لڳی ۔ سردار دا نشہ وی اکھڑ ڳیا تے گھبرا تے جلدی نال ٻاہروں بھنا ۔ شودی جنت کمرے وچ تڑپدی رہی تے تڑپدیں اپنڑی جند ݙتوسی ۔ گولی دی آواز سݨ تے رمضان تے منشی ریاض وی بھڄ آئیے بس ڈیکھݨ تاں جنت خونو خون اللّٰہ کوں پیاری تھی چکی ہئی۔ پولیس کوں اطلاع کرݙیتی ڳئی،پولیس موقع تے پڄی تے جنت دی لاش کوں پوسٹ مارٹم کیتے چا ڳئی۔ سردار خلیل کوں گرفتار کر گھدا ڳیا۔

اگلی ڈیوار پوسٹ مارٹم دے بعد جنت کوں اپنے پیو ماء نال دفنا ݙتا ڳیا۔ سردار خلیل کوں عمر قید سنا دیتی ڳئی ۔۔۔۔۔۔۔۔۔۔۔ویلہ گزر دا ریہا سردار خلیل بس ہک سال دی قید دے بعد چھٹ گیا۔ تے اوں کالو دا گھر توڑوا تے دکاناں بنڑوا ݙتیاں تے اتھاں مارکیٹ بݨ ڳئی۔