سرائیکی مکالمہ ازقلم ندیم قاصراُچوی،saraiki makalma by Nadeem Qasir Uchvi

بزرگ تے نیگر دا مکالمہ

از۔۔ ندیم قاصراُچوی، اوچشریف

بزرگ: اسلام علیکم پتر !

نینگر : وعلیکم السلام ݙاݙا کیا حال ہے ؟

بزرگ: ابا میں تاں ٹھیک ہاں، اڄاں توں

پڑھدا ودیں؟

نیگر: جیا ݙاݙا!

بزرگ : وئے میݙا پتر! کے تئیں اڄاں پڑھسیں تیݙے نال دے تاں افسر لڳ ڳن۔

نینگر: کیرھے افسر لڳ ڳن ݙاݙا ؟

بزرگ: ابا میݙا! خمیسے دا پتر چپراسی لڳ ڳے آج اوندی رات اے، فروقا  مقصود  دا  پتر  او  ہسپتال  دے  وچ  مالی  لڳ  ڳے، منظورے  دا  پتر  سجو  پُلوس(پولیس)  دے  وچ  لڳ  ڳے۔ نکے  وݙے  سارے  پڑھے  لکھے  کئی  نہ  کئی  نوکری  وچ  لڳ  ڳن  توں  تاں  اڄاں  پڑھدا  پئیں،  ابا!  توں  وی  نوکری  ڳول۔ 

نینگر: اچھا  ݙاݙا: (کھلدیں ہوئیں)  اے  سارے  افسر  لگ  گن؟

بزرگ: ابا ! ہِیکوں  چا  ݙیکھ  توں  اپݨا  کیا  ناں  ہے  اپنے  رفیقے (رفیق)  کوں  بگے  نائی  دا  پتر  تیݙے  نال  پڑھدا  ہا، ہݨ  ݙیکھ  اخبار  وچ  افسر  لڳ  ڳے۔

نینگر: اچھا(زور  دا  کِھلدیں  ہوئیں)۔ 

بزرگ: ہا  پتر  اچھی  چنڳیں  آمدن  ہے  اوندی۔

نینگر: وئے بھولا ݙاݙا!  او  تاں  ایوویں  لوکیں  کوں  لُٹی  ودے۔

بزرگ: کینا  کینا  پتر  او  تاں  وستی  دیاں  عورتاں  کوں  بے  نظیر  والے  پیسے  اَتے  شناختی  کارڈ  تے  ٻیاں  ٻیاں  چیزاں  دے  وارم(فارم)  لکھوا  ویندے۔ لوکیں  دا  بھلا  کریندا  ودے۔

نینگر:   ہائے  وئے  ݙاݙا ہائے!   تیکوں  کیا  ݙساں  اوتاں  وستی  دیاں  عورتاں  شودیاں  کوں  لُٹی  ویندے  نامراد۔  ہک  ہک  عورت  کنوں  پنج  پنج سو  گھن ڳے    تے  اڄ  تک  تاں  کہیں  دا  کم  نیں  تھیا۔ 

بزرگ:   پیسے  تاں  او  وارم (فارم)  دے  گھندے  ناں۔

نینگر:  وئے  ڈاڈا!   اللہ  سئیں  اوکوں  ہدایت  ݙیوے  بس۔ 

بزرگ:   مُڑی  توں  کیا  سوچی  توں  کیا  بنڑسیں؟

نینگر:  بس  ݙاݙا!  اللہ  سئیں  اچھا  انسان  بنڑاوے  ہدایت  تے  رکھے  ایہو  ٻہوں  ہے۔ تعلیم  صرف  نوکری  کیتے  تاں  کینی  ہوندی۔ تعلیم  تاں  انسان  کوں  اچھا  بنڑیندی ہے،  ول  وی  اگر  کوئی  پڑھ  لکھ  تے  جاہلیں  والے  کم  کرے  تاں  ول  تعلیم  دا  کیا  فائدہ۔

بزرگ: کیویں  پتر؟

نینگر:  پروں  ݙیکھ  ݙاݙا!  جیندے  ناں  آہدیں  پولیس  وچ  لڳ  ڳے،  کھوتی  ریڑھی  تے  داݨے  لڈی  ودی  تے   کیویں  کھوتی  دی  ماء  بھیݨ  پونڑیں  پے۔ ول  توں  آہدیں  جو  افسر  لڳ  ڳے  ڈاہ جماعتاں  تاں  پڑھ  ڳے  پر  شعور  تاں  نیں  آیا۔

بزرگ: پتر!  ولا  وی  نوکری  نوکری  ہوندی  اے۔ اچھا ابا  بھلا  کر  میکوں  گھر  تئیں  سکوٹر(موٹر سائیکل)  تے چھوڑی  آ،  میں  نیں  ٹر  سڳدا  زیادہ۔

 نینگر: آ  ݙاݙا آ !  بہے  ول  تیکوں  گھر  پڄا  آواں۔