سرائیکی کہانی۔۔ " جو تھے،ٹھیک تھے " ازقلم۔محمد افضل میتلا

" جو تھے،ٹھیک تھے "

ازقلم۔محمد افضل میتلا

ہک دفعہ دا ذکر اے جو ہک بادشاہ دا وزیر ہئی۔

اوندی اے عادت ہئی جو ہر ڳال تے اہدا ہئی ٹھیک تھے،

اے وزیر بادشاہ دا سب توں قریبی تے خاص وزیر ہئی، بادشاہ ایندے بغیر نا کوئی کم کریندا ہئی تے نا کتھائیں سفر۔

ہک ڈینہ بادشاہ میدان اچ تلوار بازی دی مشق کریندا کھڑا ہئی تے اچانک تلوار ایندے ڈوجھے ہتھ دی انگل چئی ڳئی، نال کھڑا وزیر آپݨی عادت مطابق ٻول پیا جو تھے ٹھیک تھے

اے ڳال سݨ تے بادشاہ کوں کاوڑ آڳئی جو میڈی انگل ڳئی اے اہدے ٹھیک تھے، بادشاہ نے حکم ڈتا اینکون زندان اچ سٹ ڈیو۔ حکم مطابق وزیر کوں قید کر ڈتا ڳیا۔

کڃھ ڈہنہ بعد بادشاہ شکار تے نکلیا۔

کافی دیر بڃھ دھرک بعد بادشاہ کوں ھک ہرݨ نظر آیا بادشاہ ایندے پچھوں گھوڑا بجھایا تے تیر نال نشانہ ٻدھا، تیر ہرݨ دی لت تے ونڃ لڳا تے ہرݨ منڈا (لنگڑا) تھی بھڃݨ لگ پیا،

بادشاہ ہرݨ دے پچھوں ہرݨ اڳوں ہرݨ جھتیں اچوں لکدا غیب تھی ڳیا، تے بادشاہ اونکوں ڳولݨ دے چکر اچ واپسی دا رستہ بھل ٻیٹھا،

رستہ گولیندا ودا ہئی کہ اچانک بادشا دے اتے ہک ڃال آ پیا جیندے اچ بادشاہ جکڑیج ڳیا تے اتنے اچ بادشاہ دے گرد بڈے قد ( چھوٹے قد ) آلی مخلوق کٹھی تھی ڳئی جنہیں آ تے بادشاہ دے ہےھ پیر رسی نال بدھ تے آپݨے سردار کول گھن گے۔ بڈیاں دا سردار ڈاڈھا خوش تھیا تے آپݨے پہرے داراں کوں آکھیا تساں ٻہوں وڈا کارنامہ کر آیو کئی عرصے توں آپاں آپݨے دیوتا دے اڳوں کوئی قربانی نی کیتی چلو اینکوں دیوتا دے اڳوں سٹو تے ذبح کرو۔ بادشاہ کوں دیوتا دے اڳوں سٹیونے تے ہک بڈا تلوار کھڑی کر تے سر قلم کرݨ لگا ،سردار دی آواز آئی رک ونڃ ، اچانک سردار دی نظر بادشاہ دی کٹی ہئی انڳل تے پئی تے سردار نے آکھیا اے عیبی اے ایندی قربانی دیوتا قبول نا کریسی اینکوں چھوڑ ڈیو۔ بادشاہ اللہ دا شکر ادا کیتا تے اونکوں وزیر دی ڳال یاد آئی جئیں ہتھ کٹیڃݨ تے آکھیا ہا جو، جو تھے ٹھیک تھے۔

بادشاہ جلدی جلدی محل آیا تے وزیر کوں طلب کیتوس۔

وزیر کوں سارا حال ڈتس ۔ تے اکھس یار تیڈے نال ذیادتی تھی ڳئی اے وزیر ٻولیا جو تھے ٹھیک تھے بادشاہ پچھیا ایندے وچ کیا ٹھیک تھے توں تاں بے گنہا رڳڑیا رہیں۔ وزیر کھلیا تے ٻولیا حضور اگر میں قید نہ ہوندا دا ضرور تہاڈے نال ہوندا تے بڈے تہاکوں تاں چھڑ ڈیندے تے میڈی قربانی تھی ڳئی ہوندی ہݨ۔۔

" بیشک ہر کم اچ اللہ دی حکمت ہوندی اے "