مہرین فاطمہ سرائیکی افسانہ ۔۔mahreem Fatima saraiki afsaan

مہرین فاطمہ افسانہ ۔۔mahreem Fatima afsaan

ناں جاواں ہا

مہرین فاطمہ تھہیم

دھیاں واسطے پیو کل کائنات ھوندے سکینہ دی عمر 35 سال تھی چکی ھئی لیکن اڄاں تئیں ایندی مجبور لاچار ما ایندے ہتھ پیلے نہ کرسڳی۔پیو اللہ ݙتہ تاں سکینہ دے ڄمݨ دے ݙو مہینے بعد سردار جہانگیر خان دے منشی دے ہتھوں شراب دے نشہ وچ دھت کہیں چھوٹی جئیں ڳال پاروں اللہ ݙتہ کوں ڳوڳھا ݙے ݙیتا غریب شودا وجود دا وی تھوڑا ھا اتھائیں جان ہر ٻیٹھا۔منشی تاں کجھ سالاں بعد چھٹ ڳیا۔پر سکینہ تے اوندی ما ہاجرہ کلہیاں تھی ڳیاں۔ ہاجرہ شودی تیݙی میݙی محنت مزدوری کر تے وقت گزریندی رھئی۔دھی جوان تھی ڳئی۔ سکینہ چٹی گوری تے سوھنڑیں نقش نین والی ھئی۔۔پر اے ظالم زمانہ دولت دا لالچی ھے۔کئی سارے سکینہ دے رشتے آئے مگر رشتہ نہ تھی سڳیا۔جتنے وی رشتے آئے لکھاں روپے دا ݙاج دا مطالبہ کریندے ھن۔کتھوں شودی غریب رنڈڑ ہاجرہ انھاں دی ݙیمانݙ پوری کر سڳدی ہئی۔ایویں وخت دی رفتار دا شکار سکینہ شودی 35سال دی تھی چکی ہئی۔مسلسل ݙکھ تے غماں دا شکار ھووݨ پاروں ادھ سر دے وال چٹےتھی چکے ہن جنھاں کوں سکینہ مہندی لاتے رتا کالا کیتا ھویا ہئی۔ہک ݙینھ نال والے ہمسایاں دے گھر انہاں دے کوئی دور دے مہمان آئے ھوئے ہن۔شفعیہ مائی (ہمسائی) سکینہ دا ݙکھ سنڑاوݨ لڳ ڳئی۔سارا حال سنڑایا تاں آئے ھوئے مہماناں وچوں ہک رن آکھیا میکوں ݙکھا تاں سہی میݙی تاڑ وچ ہک رشتہ ھے۔میں کوشد کریندی ہاں۔شفعیہ مائی ایں رن کوں سکینہ دے گھر ڳھن ڳئی۔ملی جوڑی ڳالھیں باتیں کیتونے تے سکینہ دی ما کوں اوں رن آکھیا ہک رشتہ ھے ݙاج نی منگدے میں انہاں نال ڳال کریندی ہاں اللہ خیر کریسی۔

او رن ٹر ڳئی۔ چار ݙینھ دے بعد گھوٹ دی ماء تے او آ ڳئے سکینہ دی ڳال پکی تھي ڳئی تے ہفتے بعد شادی ڳنڑیں ڳئی سکینہ پرنیج تے ساہوریں پج ڳئی شروع دے ݙینھ تاں سوہنٹے تاں چنگے لنگھ ڳئے ول ایندی سس اینکوں نوکر آلی کار کماں تے لا ݙتا ۔ مختیار ( سکینہ دا گھر آلا) پہلے وی پرنیا ہوئیا ہا پر ذال مر ڳئی ہئی۔ ترائے بال ہس آپ شرابی تے چرسی ہئی۔ اکثر نشے دے وچ راہندا ہئی۔ شودی سکینہ کو ڳال ڳال تے مارݨ شروع کر ڈیندا ہئی۔ ایندی سس وی اینکوں مہݨے ݙیندی ہئی جو تہاݙے کنوں کیا اے؟ "اساں تاں ݙاج وی نی گھدا اساں تاں تہاݙے اتے احسان کیتے۔ توں کیا سمجھی ہاویں اتھاں تیݙے کیتے پھلیں دے تخت لڳے پے ہوسن۔ اپݨاں سن ݙیٹھے وی تیݙے سن دیاں نانیاں ݙاݙیاں بݨریاں ودن۔" اے مہݨے اوکوں خنجر وانگ ہاں وچ لڳدے ھن۔ ہک ݙینھ سکینہ دی ماء دھی کوں ملݨ سانڳے آئی تاں دھی دا حال ݙیکھ تے اندری اندر مر ڳئی۔ دھی کوں ڳل لاتے ٻہوں سارا ویلا رونی تے آکھیس

"توں چل میݙے نال اے تاں ظالم لوکیں دے ہتھ آ ڳئی ہیں"۔

پر سکینہ آکھیا

"نئیں اماں میں ہݨ اتھوں مر تے ویساں ایہو میݙا گھر اے"۔

سکینہ دی ماء شودی روندیں روندیں آکھیا۔

"میݙی دھی لاوارثیں دے کوئی گھر نی ہوندا۔ جیندا کوئی وارث نی ہوندا او آپاں ماء دھی وانگوں رل ویندن۔"

سکینہ دی ماء جیڑھے پیروں آئی ہوں پیروں ولدی گھر ٹر ڳئی۔ روندیں روندیں دھی کون آکھیس

"جڈاں ظلم سہہ سہہ تے تھک پوویں تاں ول ماء دی جھولی وچ آ ونجی۔"

روندیں روندیں سکینہ دی ماء گھر ول گئی۔ اجاں ݙوں ݙینھ ڳزرے ہوسن خبر ملدی اے جو سکینہ دی ماء میہہ زیادہ آوݨ دی وجہ توں کوٹھے دی چھت ݙھن پاروں اللّٰہ کو پیاری تھي ڳئی اے۔ سکینہ جݙاں اے خبر سنڑی تاں بے ہوش تھي ڳئی کیونجو ایں کائنات تے خدا دے بعد اوندا آخری آسرا وی ناں ریہا۔ ماء دے منہ تے وی ناں پج سڳی ہاجرہ کوں دھی دے پجن توں پہلے دفنا ݙتا ڳیا۔ماء دی جدائی تے ساہوریں دے مہݨے سکینہ کو اندری اندر مکا ݙیتا۔ ہک ݙینھ گھر دا کم کریندے ہوئیں خون دی الٹی آئی۔ ݙاکدار کنوں گھن ڳے تاں پتہ لڳا جو ایکوں کنسر اے۔ گھر پجی تاں سس آکھیا

"وے مختیار آ اے کتھوں کنسر دی ماری متھے لڳی اے، میݙے تاں چھوٹے چھوٹے ٻال ہن ( مختیار دی پہلی ذال وچوں ٻال) اے تاں میݙے ٻالاں کوں وی بیماری لا ݙیسی ایکوں ماء دے گھر چھوڑ آ تے علاج سانڳے کجھ پیسے وی ݙتی آ ویں۔"

مختیار چھی ہزار اوندے ہتھ پکڑوایا تے بس تے ٻلہا ݙتا۔ سکینہ دے اندر ماء دا غم ، گھر دا تے بیماری دا غم ٻہہ ڳیا ہا ۔ جوں جوں ماء دا گھر نیڑے آندا ویندا ہئی اوویں ای سکینہ دے دل دی دھڑکن ڳھٹ تھیندی ویندی ہئی۔ اوندے پیکیاں دے گھر کنوں پہلے ہک قبرغستان آندا ہئی جتھاں اوندی ماء دی قبر وی ہئی۔ بس توں لہہ تے او سدھی ماء دی سراندی ٻہہ تے ڳوݙیاں دے وچ سر ݙیتے ہک ݙھاڑ کݙھ تے آکھیس

"اماں میں ناں ڃاواں ہا" 

تے اتھائیں اللّٰہ سئیں کوں پیاری تھي ڳئی